एमाले सभासदको परीक्षा छोरीबाट

सरकारको नेतृत्व गरेको एमालेकै एक सभासद् किरणदेवी यादवले आफ्नो नामबाट छोरीलाई परिक्षा दिन लगाएको रहस्य खुल्न आएको छ । सर्लाहीको मानपुर घर भएकी एमाले समानुपातिक सभासद् किरणदेवीले स्थानीय मानपुर माविबाट एसएलसी परिक्षाका लागि फारम भरेकी थिइन् । बरहथवामा रहेको चक्र जनता सहिद गंगा माविमा रहेको केन्द्रमा नक्कली परिक्षार्थी बनेर उनकी छोरी ममतादेवीले परीक्षा दिइरहेको आइतवार पत्ता लागेको छ । ममतादेवी स्तानक तहकी बिद्यार्थी हुन् ।

आफुले आमाको नाममा परिक्षा दिइरहेको हल्ला बाहिर चलेको पत्तो पाएपछि छोरी ममताकुमारीले आइतवार दिइरहेको तेस्रो परीक्षा बिचमै छाडेर परीक्षा हलबाट बाहिरिइन् । एमाले सभासद् किरणदेवीले माइती रौतहटबाट कक्षा आठ पास गरेको बताइएको छ ।