तेस्रो पर्वत महोत्सव तीन दिनमा ४० लाख रुपैयाँ बराबरको कारोबार

 धौलागिरी अञ्चलको पर्यटन, लघु उद्यम र व्यापारलाई प्रवर्द्धन गर्ने उद्देश्यले सोमवारदेखि सुरु भएको तेस्रो पर्वत महोत्सवमा दर्शकहरुको उत्साहजनक सहभागिता रहेको छ। महोत्सव सुरु भएको तीन दिनमै ३० हजार भन्दा बढि मानिसले महोत्सवको अवलोकन गरेका छन्। महोत्सव आयोजक समितिका संयोजक होमनारायण श्रेष्ठका अनुसार तीन दिनमा ४० लाख रुपैयाँ बराबरको कारोबार भएको छ। पर्वत प्रवर्द्धन, हाम्रो दायित्व भन्ने नाराका साथ सुरु भएको भएको महोत्सव एक सातासम्म सन्चालन हुने छ।
महोत्सवमा स्थानीय उत्पादन, अल्लोका कपडा, लोक्ताको नेपाली कागज, हस्ताकलाका सामग्री, सुन्तलाको जुस, मह, जडिबुटी लगायतका सामानको बाहुल्यता रहेको छ। महोत्सवमा आकर्षक पुरस्कार सहितका भलिबल, लोक दोहोरी, नृत्य लगायतका प्रतियोगिताको आयोजना गरिएको छ। त्यसैगरी चर्चित लोक गायक पुरुषोत्तम न्यौपाने, कोमल वली, राजन ठकुरी, तिलक बम मल्ल, नविन पौडेल, स्मृति पुन, माया गुरुङ्ग तथा हास्य कलाकार देवीराम पराजुली र शिवहरी बैरागीको प्रस्तुतिले महोत्सवलाई थप मनोरन्जपूर्ण बनाएको छ।