खाना नपाएको निहुँमा आफ्नै श्रीमती लिलालाई छुरा प्रहार

सुर्खेत, चैत्र २२ - खाना नपाएको निहुँमा तातापानी गाविस–८ बच्छीका आइते विकले आफ्नै श्रीमती लिलालाई छुरा प्रहार गरेका छन् । गत आइतवार साँझ ७ बजे रक्सीले मातेका आइतेले श्रीमतीलाई किन खाना नपकाएको भनी छुरा प्रहार गरेका हुन् ।

छुरा प्रहारबाट लिलाको छातीमा गहिरो चोट लागेको छ । उनलाई स्थानीय शिक्षक केशव खत्रीको सहयोगमा प्रहरीको गाडीबाट सोमवार राती ८ बजे उपचारका लागि क्षेत्रीय अस्पताल कालागाउँ ल्याइएको छ ।

घरमा खानेकुरा केही पनि थिएन, तर पनि रक्सी खाएर आएका बुबाले खाना किन नपकाएको भनी छुराले हाने, आमासंगै अस्पतालका आएका जेठा छोरा ज्योतिले भने ।

छुरा प्रहारबाट रक्ताम्मे भएकी लिलालाई स्थानीय शिक्षक केशव खत्रीको पहलमा करिव २ हजार चन्दा उठाएर उपचारका लागि अस्पताल ल्याइएको हो । उनको अस्पतालमा उपचार भइरहेको छभने छुरा हान्ने श्रीमान् आइतेलाई छिमेकीले पक्राउ गरी प्रहरीको जिम्मा लगाएका छन् । आइतेलाई अहिले जिल्ला प्रहरी कार्यालय सुर्खेतमा हिरासतमा राखिएको छ ।

अस्पतालमा उपचार गराइरहेकी लिलालाई समाचार संकलन गर्न पुगेका गोखारपत्रका रिपोर्टर ललित वसेल र प्रहरी जवान तर्कबहादुर शाहीले रक्तदान गरेका थिए । अत्यन्त गरिव परिवारका लिलाको उपचारका लागि आवाज संस्थाले सहयोग गरेको छ ।