गुल्मीमा आगलागीबाट नौ घरसहित आठ गोठ जलेर नष्ट

गुल्मीको ठूलो लुम्पेक गाउँ विकास समितिमा लागेको आगलागीबाट नौ घरसहित आठ गोठ जलेर नष्ट भएका छन्। शनिबार साँझ लागेको आगोबाट करिब पचास लाख रुपैयाँ बराबरको क्षति भएको अनुमान गरिएको छ। आगलागीबाट मानवीय क्षति नभए पनि घरभित्र रहेका सम्पूर्ण कागजपत्र, लत्ताकपडा, अन्नपात जलेर नष्ट भएको स्थानीय ओम कुवँरले जानकारी दिनुभयो। स्थानीयवासी र छिमेकी जिल्ला स्याङ्जाबाट पुगेका सर्वसाधारणको प्रयास पछि आगो नियन्त्रणमा आएको  थियो। हावाहुरीका कारण आगो नियन्त्रणमा लिन कठिन भएको थियो।
वसन्त तरामुको घरबाट सल्किएको आगो अत्यधिक हावाहुरीका कारण तत्कालै अन्य घरमा पनि फैलिएको थियो। आगलागी भएको स्थान सदरमुकाम तम्घासबाट १४ कोष पूर्वमा पर्छ।