‘पाएदेखि बाँचुन्जेल तलब भत्ता खाने सोच माओवादीमा छ-केपी शर्मा ओली

एमाले नेता केपी शर्मा ओलीले सात बुँदे सहमति एमालेले मान्दा पनि नमान्ने र त्यसको कार्यान्वयन पनि नहुने दाबी गरेका छन् ।

सदरमुकाम धादिङवेसीमा शनिबार प्रेस चौतारी धादिङले आयोजना गरेको पत्रकार सम्मेलनमा ओलीले ओलीले सात बुँदे सहमति कुनै पनि हालतमा कार्यान्वयन नहुने दाबी गरे । ‘सुरक्षा सम्बन्धी मन्त्रालय अहिलेकै अवस्थामा माओवादीलाई दिन मिल्दैन,’ उनले भने ।

ओलीले तोकिएको समयमा संविधान बनाइसक्नुपर्नेमा माओवादीका नेताहरु फेरि संविधान सभाको म्याद थप्नुपर्छ भन्दै हिडेको आरोप लगाए । ‘पाएदेखि बाँचुन्जेल तलब भत्ता खाने सोच माओवादीमा छ,’ उनले भने ।

काम गर्दागर्दै नभ्याएमा मात्र म्याद थप्न उचित हुने भन्दै उनले संविधान बनाउने समय रहुन्जेल काम नगरी वस्ने अनी फेरि समय थप्ने कुरा हाँस्यास्पद भएको बताए ।

सरकारसँग लडाकु कार्यकर्ताको लागि भनेर भत्ता बुझेर माओवादी नेताहरुले मोज–मस्ती गर्ने गरेको आरोप समेत ओलीले लगाए । ४ वर्ष देखि शिविरमा रहेका देशका जागरुक युवाहरुलाई झुट्टा आश्वासन दिएर, भ्रम फैलाएर, क्रान्तिको हल्ला गरेर उनीहरुलाई हतियार बनाएर राज्यले दिएको तलब पार्टीले बुझेर लिने र रासनको लागि दिएको रकम समेत पार्टीले खटाइ माथिल्लो तहका सुबिधाभोगी नेताहरुले खाने गरेको उनको आरोप थियो ।

ओलीले माओवादीको व्यवहार गोरुसरह भएको टिप्पणी गरे । ‘गोरुले किन घ्याच्च हान्छ किनभने बोल्न जान्दैन,’ उनले भने, ‘माओवादी पनि त्यस्तै छ, मनपरेन भनेर गोरुले झै फरक विचार राख्नेलाई घ्याच्च हाल्ने, हात खुट्टा भाँची हाल्ने, टाउको फुटाइ हाल्ने ।’