विद्युत्को सुविधा नभए पनि पर्वतको थापाठाना मा कम्प्युटर सुविधा

सूचना प्रविधिको माग बढ्दै जान थालेपछि विद्युत् सेवा नपुगेको पर्वतको थापाठाना गाउँ विकास समितिको मेहलपोखरीमा जेनेरेटर प्रयोग गरी कम्प्युटर शिक्षा दिन थालिएको छ ।थापाठान-६ का जागरुक युवा रुजित श्रेष्ठले "देउराली कम्प्युटर इन्स्टिच्युटु" स्थापना गरी गाउँमा आधुनिक संचार सुविधा दिन थालेका हुन । 

भारतबाट सूचना प्रविधिमा स्नातक गरेका श्रेष्ठले गत भदौदेखि सेवा सुरु गरेका हुन् । महावीर पुनको योगदान देखेर आफूमा पनि गाउँमै बसेर केही गर्ने सोच आएको उनी बताउँछन् ।

गाउँमै कम्प्युटर शिक्षा लिन पाएपछि विद्यार्थीहरु पनि निक्कै खुसी भएका छन् । स्थानीय उच्च माध्यमिक विद्यालयमा पढ्दै गरेकी स्मिता थापाले गाउँमा कम्प्युटर सिक्न पाएकाले बजार झर्न नपरेकामा खुसी व्यक्त गरिन् ।

स्मितामात्र होइन प्रौढ शिक्षा पढेर सामान्य साक्षर मात्र बनेका रामु सुनार पनि कम्प्युटर शिक्षा लिइरहेका छन् । वैदेशिक रोजगारीमा जाने योजना बनाएका सुनार इमेल-इन्टरनेटदेखि अफिस प्रोग्राम सिकेपछि आफूलाई सहज हुने बताउँछन् ।

गाउँमा सूचना प्रविधिको सुविधा दिने श्रेष्ठको प्रयास भने निक्कै कठिन छ । जेनेरेटर चलाउन प्रतिघन्टा एक लिटरभन्दा बढी तेल खर्च हुन्छ । कम्प्युटर सिक्ने विद्यार्थी जम्मा पाँचजना मात्र छन् । विद्यार्थीबाट आएको शुल्कले त जेनेरेटरको तेल खर्चसमेत उठ्दैन । तर भोलि राम्रो होला भनेर चलाइराखेको छु- उनी भन्छन् ।

अहिले दुईवटा कम्प्युटरबाट सेवा दिइरहेका श्रेष्ठले विद्यार्थी र शिक्षकलाई लक्ष्यित गर्दै दुईवटा कम्प्युटर थप गर्ने योजना बनाएका छन् ।